Act 2 | APZ | STEP | Oso Sɨkuno Engo iyoho humayo'ne Pentikous osomo a'amu Jisasɨmo inɨngkawo'nɨngkohofoso ango fipo uhu'mokumentohofofoho.

Acts 2

Anɨtuye Towahuno pmmentisofoho.

1 Oso Sɨkuno Engo iyoho humayo'nePentikous ^{▼▼2:1 Oso iyoho homayo sɨkunoso sɨkunofifɨtiso (50) Anɨtu Kako A'amu Isɨlael somo Uyakolo'mentiso somne'no Syafɨsiyo Sɨkuno Engo somo humantɨfe sohontaPentikous imofapɨwo'nɨngkisofoho.} osomo a'amu Jisasɨmo inɨngkawo'nɨngkohofoso ango fipo uhu'mokumentohofofoho. 2 Osopo nuhu'mokahonɨngkofi tɨ'mayo yoka pa'nɨngo ahwomo mta'ango ho'nonto ango uhu'mokumentohofo somo uhula'o'mentisofoho. 3 Oso a'amuso oso tɨ'mayo yoka upa'nontɨfi uhwonɨmentohofoso tɨ'melanyo hopa yonto oso hiso mtɨhupo mtɨhupe lohofonto a'amu nohumentanɨngkofo somo a'apahopo humolawopmmentisofoho. 4 Oseso Anɨtuye Towahuno Wopɨngo a'amu somo ifeehu'mokasi lohofonto hungkuno kengo kengo nom'ne a'amufe mampaho pa'nyo hofɨkoe mangomo umasiyahonɨngki hofɨko hungkuno kengo kengo lɨmentohofofoho. Oso hungkunoso Towahuno Wopɨngoso umentisofoho.

5 Juta a'amu hwaho kengo kengoponta'ango Mousesɨye honɨngkano hungkunomo inɨngkamotofoso Jelusalem humamentohofofoho. 6 Oso tɨ'mayo yoka hiso ho'nɨngkahonɨngki a'amu Jelusalem humamotofoso nupa'nontɨfi a'amu pi'nɨngo engo oso angopo komo'no uhu'mokumentohofofoho.Apousel sohwa hungkuno kengo kengo lontanɨngkofi a'amu hopi'nonohinoso hofɨkoe mango hungkuno lɨmotofoso upa'nɨmentohofofoho. 7 Nupa'nontɨfi yomo yontɨfi huno pi'nɨngo engo syafɨhu'mentohofi, Olo pipilɨkeno. Oso a'amu hungkuno kengo kengo lalokwofo lohwa Ngkalilinta'ango hwafoho. 8 Nakwoe hungkuno kengo kengo loso na'uja aswo nema'mentohofo osohonta upa'nɨmentɨhwone pa'nyofoho. Oso hiso pipilo. 9 Nakwo kengo kengopo nta'nɨngo'nwoho. Patiya, Mitiya, Elam, nom'ne a'amu Mesopoutemiyanta'ango, nom'ne Jutiya, Kapotousiya, Pountos, Esiya, 10 Fɨlijiya, Pamɨfiliya, Ijip, Lipiya, Sailini mafone sopo nom'ne Loum mta'ango hn'nwi humalohwono. 11 Nakwo a'amu Juta hn'nnonji nom'ne a'amu kengoso nakwoe yahinomo inɨngkowalokwofo so'nji, Kɨlitnnta'angoso Alepiya'njoso nakwo hopi'nonohino hn'nwi yo'mayo wonyoangkafo Anɨtu iwo'nɨngkiso so'no nakwoe hungkuno kengo kengoso upo'nalokuhwono. 12 Ose syafɨsyontɨfi yomo yomo yontɨfi huno engo syafɨsyontɨfi ulɨmentohofi, Oloso pipilo. 13 A'amu fehohnjo sitofo ole ulɨmentohofi, olo hwe lohwa Anɨtuye hungkuno nelalokwofo lohwa hofɨko mijo iyoho'njo niloho'nontɨfi kolalokwofo. Ose ulɨmentohofofoho.

Pita kako Anɨtuye hungkuno lutɨhwamentisofoho.

14 Pitaapousel aho hopi'nono sɨfe mta'ni anga'nohino sohwanji nolɨkafonto mango engo ulɨmento, Sekwo Jutiyanta'ango soku a'amu Jelusalem humalofo sɨkunonji nje hungkuno waselɨmonne'no yohono. Sekwo upa'nɨmno. 15 Ole lolalokwofo, Hwe lohwa mijo iyoho'njo niloho'nontɨfi kolalokwofo. Ose lolalokwofo. Awonoho. Ose'maho. Olo mofehi'nyo'njoho. A'amu mofehi'nyo'nji mijo iyoho'njo manyo hwafoho. 16 O'o hohonta Jouel hwe Anɨtuye hungkuno lɨmojo sohwo olo hilo so'no lɨmentisofoho. Kakoe hungkunoso olohonta ne imo'nalofoho. Jouel ole mtɨ'mokumentisofoho.

17 Anɨtu hohonta ole ulɨmento, Sɨkuno moi'wo imo'nyoso mofone sohonta nje Towahuno sofe yokumpohn'nyoso a'amu hopi'nonohinomo uyonefoho.
Sekwoe hwomu sohwanji mu sopeenji hofɨko Anɨtuye hungkuno ulɨfitnnefoho.
Hwe songo sohwamo ngko wojo uhwonyo pa'nɨngo yo'mayo so'no utɨhwamnefoho.
Hwe a'mane sohwa wojo uhwonɨfitnnefoho.
18 U, nje Towahunoso nje hwe moya'mi syoho ntohofiyo somo uyɨmnefoho.
Ose uyohonɨ'mo hofɨko nje hungkuno nalɨfitnnefoho.
19 Sekwo ahwomo ajwo lopo tɨmo uhwonɨngkujo'no nom'ne kengoso setɨhwamnefoho.
Olo hwaho lopo yo'mayo kengo wonyoangkafoso nomtɨ'mokumnefoho.
Oso kengoso honɨyo'nji toho'nji tɨkayo hujenjemo'nji nomtɨ'mokumnefoho.
20 Olo mofehi'nyolo sɨkwo'mno imo'nɨngkuhwosi sɨkuno meefonefoho.
Hamnoso honɨyo'nohino imo'nonefoho.
Olo hiloso nuhwonɨngkuji u nje Sɨkuno Engoso imo'nonefoho.
21 Oso hohosohonta hwe fihwa hwoya'mi fifa ngkine'no joho ntɨkujo somo utɨma'mnefoho.
Nje a'amu imo'nɨfitnnefoho.
Oso hungkunoso Jouel mtɨ'mokumentisofoho.

22 Sekwo a'amu Isɨlael soku, olo hungkuno haloho upa'nɨmno. Jisas Nasalet nta'ango oso huno sekwo huno moi'wonoho. Anɨtu Jisasɨmo kakoe yokumpohn'nyo uyahonɨngki olo hwaho lopo Jisas yo'mayo kengo wonyoangkafoso netɨhwamentisofoho. Oso hiso nuhwonontani nakwo huno naimentisoso Jisas Anɨtuye Hwomu Ne hweho. 23 Anɨtu kako hohonta huno ole, Nje hwomu a'amufe wonyo'ne poyo pe'nyo'ne hwahopo uhwatɨmonne'no yohono. Ose syafɨhu'mentisofoho. Oso'no olo hwe lohwo Anɨtu sekwoe ahomo ho'nahumentisofoho. Ho'nosyahonɨngki sekwo a'amu Loum somne'no ipemotasontɨfi hofɨko iyo hwojiyafɨku'nnyo somo fonjinto'ofahumentohofofoho. 24 Anɨtu kakoe hwomumo poyo pe'nyo yahino tohino somta'ni isɨhutofomanto apa'no songo ulɨka'mentisofoho. Jisas sohumo sokimo somo mokilopm'mokumentisofoho. 25 Hohonta Ntefit ole mtɨ'mokumentisofoho.

Nje Hwe Engo sohwo kako ngko'nji mofonepo humaso sohumo ngko uhwonɨwo'nɨngkohefoho.
Kako nje aho angahohnta'ni humaso sohune'no ngko mopɨwahu'mnehono.
Yo'mayo nom'neso ngkimo milojanɨmofonehoho.
26 Hiso'no nje sɨmeho wopɨngo nɨmo'nɨngkohoho.
Nje mampaho Anɨtuye yofe ho'nomayo'nefoho.
Ngko poyo pe'nɨme sohonta iyoho mannonefoho. O'o, ngko Anɨtumo uhwonɨmnefoho.
27 Nje huyo'mangoso tɨkanomo humayo'ne nɨsɨkwajiyo'eno.
Jɨje hwomufe a'apaho piso imo'nyo'eno.
28 Songo humayo'ne honɨngkano ntɨhwahino.
Kɨko ngko'nji humayo so'no nje sɨmeho wopɨngo nɨmo'nɨngkohoho.
Ntefit hohonta ose mtɨ'mokumentisofoho.

29 Nje a'amu soku, olo hungkuno Ntefit mtɨ'mokumentiso so'no yolohoso waselɨmo. Ntefit kakine'no mtɨ'mokumentiso'maho. O'o, kako poyo pe'nɨngkahonɨngki hofɨko ijopijisyahumentohofofoho. Kakoe pi'nɨmomo olo hwaho lopo weho. Nakwo tɨmo uhwonɨwo'nɨngkuhwono. 30 Ntefit kako Anɨtuye hungkuno lɨmojo hweho. Anɨtu Ntefitɨmo ulɨmento, Jɨje imu hwe yofe engo'njo jɨje yofe pa'nyo imo'nɨngkɨhwosi a'amumo umokosyohumane hweho. Ose ulahonɨngki Ntefit kako huno umentisoso oso hungkuno hiso ne imo'nonefoho. 31 Hohonta Ntefit yo'mayo Anɨtu yone'ento uhwonɨmentisoso oso'no hwe Anɨtu uhwosopo'mentiso sohwo poyo nope'nɨngkuhwosi apa'no songo nolɨkafone so'no lɨmentisofoho. Ole mtɨ'mokumento,

Kakoe huyo'mango tɨkanomo humayo'ne nusɨkwajiyo'eno.
Kakoe a'apaho piso imo'nyo'eno.
32 Oso hwe huhwo sohwo Jisasɨyoho. Anɨtu nto ulɨka'mentiso lohumo nakwo uhwonɨmentɨhwone. Osohune'no lalokuhwono. 33 Kako ahwomomo nokotasonto osopo Anɨtuye aho angahohnta'ni nto humantono. Hohonta kako ole nto nalɨmentisofoho. Ngko Anɨtuye Towahuno Wopɨngo wosejapmmo. Jisas ahwomomo nosahonɨngki Mpohwo kakoe Towahuno uyahonɨngki Jisas Towahuno hiso nehwojahonɨngki olohonta hungkuno mampaho kengo kengo so'nji selɨhwoneso yo'mayo yɨhwoneso hwapɨngo Anɨtuye Towahuno nehulo'ofalofoho. 34 Upa'nɨmno. Ntefit oso hungkunoso kakine'no mamtɨ'mokummentisofoho. O'o, kako ahwomomo masɨmmentisofoho. Ole mtɨ'mokumentono,

Anɨtu nje Hwe Engo Kɨlais Anɨtu nakwoe hwahopo uhwatɨmentiso sohumo ole ulɨmento,
Kɨko nje aho anga sohohnta'ni fosyohumaho.
35 Osopo kɨko nohumahoji ngko jɨje mango sohwamo jɨje sɨfɨki'nyo'mo enjwa'mo wakuhumotɨ'monnoho.
36 Oso'no sekwo a'amu Isɨlael soku, huno ito'no fɨsyafɨhupmno. Olo Jisas huhwo sohwo sekwo iyo hwojiyafɨku'nnyopo fonjinto'ofahumentohofo lohune'no Anɨtu Hwe Engo nemokosyohumayo'ne sohumo umokumentisofoho. Olo hwe lohwo Kɨlaisɨyoho. Pita ose ulɨmentisofoho.

Hwe moya'mi pi'nɨngo engoso sɨmeho yɨwalo'mokahonɨngkofi mijo kiyoma'mentohofofoho.

37 A'amuso olo hungkunolo nupa'nontɨfi sɨmeho tango mɨkunɨmposo umentisofoho. Pita'njiapousel nom'ne sohwanjimo ulɨmentohofi, Ou, hwe sɨfahwe, nakwo pipi yanehwono.

38 Ose ulahonɨngkofi Pita ulɨmento, Sekwo a'amu anga'no anga'no honɨngkano wonyo foho'naopmno. Anɨtuye hungkunomo tɨfi finɨngkamno. Jisas kako jɨje wonyo wae yakumofɨhwosi kakoe a'amu ne imo'nɨngkohojo'no a'amumo utɨhwayo'ne mijo wokiyosemapɨfe. Ose ikujo'no kakoe Towahuno Wopɨngo wosejapmmontonoho. 39 Anɨtu selɨmento, Nje Towahuno Wopɨngo wosejapmmo. Oso hungkunoso sekwo'ne'nji sekwoe mehomi mne'nji a'amu hwaho kengoponta'ango oso'ntnne'nohinofoho. A'amu hopi'nonohino nakwoe Hwe Engo Anɨtu kakine'no joho ulalokwofo soku kakoe Towahuno Wopɨngo wosejapono.

40 Pita ose ulonto, hungkuno nom'ne pi'nɨngo engo ulonto, ulɨmento A'amufe honɨngkano wonyomne'no i'waho fiyɨmno. Tohino engo nomapitoho. Sekwo Anɨtumo finɨngkamno.

41 Ose ulahonɨngki a'amuso nupa'nontɨfi oso hungkuno somo inɨngkowahonɨngkofi mijo kiyoma'mentohofofoho. Oso sɨkuno somo a'amutɨli tausen (3,000) Anɨtumo sɨmeho uyɨmentohofoso Anɨtuye a'amu ne imo'nɨmentohofoho.

A'amu Jisasɨmo inɨngkawo'nɨngkohofo sofe yahino songo wonyoangkafo ma'mentohofofoho.

42 Anɨtuye a'amu ne imo'nɨmentohofosoapousel sohwa Anɨtuye hungkuno lutɨhwentanɨngkofi hofɨko upa'nɨmotofofoho. Hofɨko nuhu'mokontɨfi ufo'ma'nɨmotofofoho. Hofɨko wosopayo afapo nta'ni nonontɨfi ^{▼▼2:42 A'amu pɨ'nɨngo engo huno'njo Jisas Kɨlaisɨmo inɨngkunyoso nɨhu'mokontɨfi wopae nɨmentohofofoho. Osohonta wopayo moi'wo nontɨfi hofɨko hunso Jisasɨye mɨkufo'nji honɨyo'nji ne'no syafɨhu'motofofoho.} Anɨtumo jomo ulɨmotofofoho. 43 Anɨtu kakoe yokumpohn'nyoapousel sohwamo uyahonɨngki hofɨko yo'mayo kengo wonyoangkafoso imentohofofoho. A'amuso oso hiso nuhwonontɨfi pisopisaho mjalɨmɨwentɨfi iyoho'nji yomo yomo'nji imentohofofoho. 44 A'amu Jisas Kɨlaisɨmo sɨmeho hi'ntnnono umotofoso afapo nohumantɨfi hofɨkoe ho'yango yo'mayoso nem'nohino afafoho. 45 A'amu ho'yango'njo hwaho'njoso oso hiso a'amu nom'ne somo uyontɨfi hamniyoho nomantɨfi umofonyo inyo somo yano ulohmmentohofofoho. 46 Hofɨko sɨmeho yano inontɨfi sɨkuno huhwo huhwi Anɨtuye ango engo somo nuhu'mokontɨfi Anɨtuye yofe ho'noma'motofofoho. Hofɨko wopayo nom'ne ango kengo kengomo nonontɨfi hofɨkine'no huno mosyafɨsiyo'njo yontɨfi nom'ne a'amumne'no syafɨhu'motofofoho. Oso'no hofɨko sɨmeho wopɨngo'nji humamotofofoho. 47 Wopɨngo nohumantɨfi Anɨtuye yofe ho'noma'motofofoho. A'amu hisomne'no hwe moya'mi nom'neso ulɨmotofi, Anɨtuye a'amu neso wopɨngo'nohinofoho. Sɨkuno huhwo huhwi a'amu nom'neso Anɨtuye hungkuno nupa'nontɨfi sɨmeho uyontɨfi inɨngkamotofofoho. Anɨtuye a'amu neso pi'nɨngo engo imo'nɨmentohofofoho.